ਜੀਰਾ ਦੇ ਮੱਖੂ ਰੋਡ 'ਤੇ ਚੱਲੀ ਗੋਲੀ, 4 ਜ਼ਖਮੀ

ਜੀਰਾ, 17 ਅਪ੍ਰੈਲ (ਰਜਨੀਸ਼ ਕਥੂਰੀਆ, ਪ੍ਰਤਾਪ ਸਿੰਘ ਹੀਰਾ)-ਅੱਜ ਬਾਅਦ ਦੁਪਹਿਰ ਕਰੀਬ 3:00 ਵਜੇ ਜੀਰਾ-ਮੱਖੂ ਰੋਡ ਉਤੇ 2 ਧਿਰਾਂ ਵਿਚਾਲੇ ਹੋਈ ਮਾਮੂਲੀ ਤਕਰਾਰ ਤੋਂ ਬਾਅਦ ਗੋਲੀ ਚੱਲ ਗਈ, ਜਿਸ ਵਿਚ ਦੋਵਾਂ ਧਿਰਾਂ ਦੇ 4 ਵਿਅਕਤੀਆਂ ਦੇ ਜ਼ਖਮੀ ਹੋਣ ਦੀ ਖਬਰ ਹੈ। ਸਿਵਲ ਹਸਪਤਾਲ ਜ਼ੀਰਾ ਵਿਖੇ ਜਾਣਕਾਰੀ ਦਿੰਦਿਆਂ ਸੋਨੂੰ ਪੁੱਤਰ ਗੁਰਮੇਲ ਸਿੰਘ ਵਾਸੀ ਪਿੰਡ ਗੱਜਣਵਾਲਾ ਤਹਿਸੀਲ ਬਾਘਾਪੁਰਾਣਾ ਨੇ ਕਿਹਾ ਕਿ ਉਸ ਦੀ ਜੀਰਾ-ਮੱਖੂ ਰੋਡ ਉਤੇ ਮੈਸਰਜ਼ ਸੋਨੂੰ ਐਂਡ ਸੰਦੀਪ ਮੋਟਰ ਗੈਰੇਜ ਨਾਮ ਦੀ ਗੱਡੀਆਂ ਦੀ ਮੁਰੰਮਤ ਕਰਨ ਦੀ ਵਰਕਸ਼ਾਪ ਹੈ ਅਤੇ ਦੁਪਹਿਰ ਕਰੀਬ 12:00 ਵਜੇ ਮਨਜੀਤ ਸਿੰਘ ਅਤੇ ਦਲਜੀਤ ਸਿੰਘ ਪੁੱਤਰਾਨ ਜੋਗਿੰਦਰ ਸਿੰਘ ਵਾਸੀ ਪਿੰਡ ਬਹਿਕ ਗੁੱਜਰਾਂ ਜਿਨ੍ਹਾਂ ਨੇ ਉਸ ਦੀ ਵਰਕਸ਼ਾਪ ਤੋਂ ਆਪਣੇ ਘੋੜੇ ਟਰਾਲੇ ਦੀ ਮੁਰੰਮਤ ਕਰਵਾਈ ਸੀ, ਦੇ ਪੈਸਿਆਂ ਦਾ ਹਿਸਾਬ-ਕਿਤਾਬ ਕਰ ਰਹੇ ਸਨ, ਜਿਸ ਦੌਰਾਨ ਇਨ੍ਹਾਂ ਦਾ ਵਰਕਸ਼ਾਪ ਦੇ ਬਾਹਰ ਕਿਸੇ ਨੌਜਵਾਨ ਨਾਲ ਮਾਮੂਲੀ ਤਕਰਾਰ ਹੋ ਗਿਆ ਅਤੇ ਬਾਅਦ ਦੁਪਹਿਰ ਕਰੀਬ 3:00 ਵਜੇ ਉਕਤ ਨੌਜਵਾਨ ਗੱਡੀਆਂ ਉਤੇ ਵੱਡੀ ਗਿਣਤੀ ਵਿਚ ਆਪਣੇ ਸਾਥੀਆਂ ਨਾਲ ਆਇਆ ਜਿਨ੍ਹਾਂ ਵਿਚੋਂ ਇਕ ਕੋਲ ਪਿਸਟਲ ਅਤੇ ਇਕ ਕੋਲ ਦੇਸੀ ਕੱਟਾ ਸੀ, ਨੇ 3 ਫਾਇਰ ਕੀਤੇ, ਜਿਸ ਦੌਰਾਨ ਇਕ ਫਾਇਰ ਦਾ ਸ਼ਰਾ ਉਸਦੀ ਲੱਤ ਉਤੇ ਲੱਗਾ ਅਤੇ ਇਸ ਝਗੜੇ ਦੌਰਾਨ ਮਨਜੀਤ ਸਿੰਘ ਅਤੇ ਦਲਜੀਤ ਸਿੰਘ ਦੇ ਵੀ ਸੱਟਾਂ ਲੱਗੀਆਂ।